Пробация кеңеши: аймак аралык кызматташтык иш жүзүндө

Жумгал райондук пробация органы:

Кеңештин жыйынында II чейректе аткарылган иштер тууралуу маалымат угулуп, проблемалуу маселелер жана жергиликтүү бийлик органдары менен башка кызыкдар тараптар менен кызматташтыкты чыңдоо боюнча сунуштар талкууланды.

Катышуучулар пробациядагы кардарлар менен системдүү алдын алуу ишин жүргүзүүнүн жана ар бир адамга жекече мамиле кылуунун маанилүүлүгүн белгилешти. Жыйынтыгында тиешелүү чечимдер кабыл алынып, ишти жакшыртуу боюнча сунуштар берилди.

Кочкор райондук пробация органы:

Райондук администрациянын кичи залында пробация кеңешинин жыйыны өтүп, ага акимдин орун басары, райондук кызматтардын жетекчилери — СКБ, РИИБ, билим берүү бөлүмү, ЖДПБ жана пробация органынын кызматкерлери катышты.

II чейрек боюнча иш канааттандыраарлык деп табылды. Медициналык камсыздандыруу фондунан түшкөн маалыматтарды пробациялык жана пенитенциардык көзөмөлдө турган жарандар менен иш алып барууда өз убагында жана үзгүлтүксүз колдонуу боюнча чечим кабыл алынды.

Балыкчы шаардык пробация органы:

Мэриянын имаратында пробация кеңешинин жыйыны өтүп, анда II чейрек боюнча аткарылган иштер, кайталап укук бузууларды алдын алуу, пробациядагы кардарларды кайра социалдаштыруу жана алардын оор турмуштук кырдаалдан чыгышына жардам берүү чаралары каралды.

Ошондой эле коомдук иштерди уюштуруу жана көзөмөлдөө механизмдери талкууланып, муниципалдык ишканаларга объекттерди бекитүү жана сот чечимдерин аткарууну көзөмөлдөө боюнча сунуштар берилди.

Бардык жыйындар конструктивдүү жана натыйжалуу маанайда өттү. Катышуучулар эркиндиктен ажыратууга байланышпаган жаза түрлөрүн натыйжалуу ишке ашыруу үчүн ведомствалар аралык кызматташтыкты чыңдоого даяр экенин билдиришти.