2026–2028-жылдарга карата Улуттук пландын алкагында профилактикалык иш-чаралар өткөрүлдү
Кыргыз Республикасынын 2022–2028-жылдарга карата укук бузуулардын алдын алуу чөйрөсүндөгү мамлекеттик саясаттын концепциясын ишке ашыруу боюнча 2026–2028-жылдарга карата Улуттук пландын 33-пунктунда каралган «Балдар арасында алдын алуу иштеринин натыйжалуулугун жогорулатуу» иш-чарасын аткаруу максатында өлкөнүн бир катар аймактарында өспүрүмдөр арасында укук бузуулардын алдын алуу боюнча профилактикалык иш-чаралар өткөрүлдү.
Аталган иш-чаралар «Укук бузуулардын алдын алуунун негиздери жөнүндө» Кыргыз Республикасынын Мыйзамынын 8-беренесинин 3-пунктуна, ошондой эле Кыргыз Республикасынын Министрлер Кабинетинин 2022-жылдын 23-августундагы №469 токтому менен бекитилген укук бузуулардын алдын алуу чөйрөсүндөгү мамлекеттик саясаттын концепциясына ылайык уюштурулду.
Чүй облусунун Аламүдүн району боюнча пробация бөлүмү тарабынан өткөрүлгөн иш-чаралардын алкагында В.И. Ленин атындагы жалпы билим берүүчү орто мектебинде жана Васильевка №1 жалпы билим берүүчү орто мектебинде окуучулар менен тематикалык жолугушуулар жана түшүндүрүү иштери жүргүзүлдү. Иш-чараларга Аламүдүн районунун жалпы билим берүү мекемелеринин директорлору, райондук ички иштер бөлүмүнүн кызматкерлери жана мектеп окуучулары катышты. Жалпысынан 105 окуучу камтылды.
Жолугушуулардын жүрүшүндө өспүрүмдөр арасында укук бузуулардын алдын алуу, укуктук аң-сезимди калыптандыруу жана зомбулуксуз жүрүм-турум маданиятын өнүктүрүү боюнча кеңири түшүндүрүү иштери жүргүзүлдү. Ошондой эле мектептердин, ата-энелердин жана тиешелүү мамлекеттик органдардын өз ара кызматташуусун күчөтүүнүн маанилүүлүгү белгиленди.
Ак-Суу району боюнча пробация органы тарабынан Ак-Суу айылында жайгашкан М. Мамакеев атындагы орто мектептин 9–11-класстарынын окуучулары арасында укук бузуулардын алдын алуу боюнча лекция өткөрүлдү.
Мындан тышкары, Өзгөн району боюнча пробация бөлүмү Өзгөн райондук ички иштер бөлүмүнүн балдар менен иштөө инспекторлору жана ОшТУнун академик Б. Мурзубраимов атындагы Эл аралык технологиялык жана билим берүү институтунун окутуучулары менен биргеликте 16–18 жаштагы студенттер үчүн профилактикалык жолугушуу өткөрдү.
Иш-чаранын жүрүшүндө студенттерге пробация чөйрөсүндөгү мыйзамдар, алардын укуктары жана милдеттери тууралуу маалымат берилип, жаштар арасында кылмыштуулуктун алдын алуу маселелери талкууланды.
Ошондой эле Ош шаары боюнча пробация бөлүмү Ош шаарындагы №21 А.С. Пушкин атындагы мектеп-гимназиясында жашы жете электер менен иштөө инспекторлору менен биргеликте профилактикалык иш-чара уюштурду.
Жолугушууда окуучуларга кылмыштуулуктун алдын алуу, үй-бүлөлүк зомбулукка каршы күрөшүү, мыйзамдарды сактоонун маанилүүлүгү жана укуктук жоопкерчилик тууралуу маалыматтар берилди.
Өткөрүлгөн иш-чаралар жаш өспүрүмдөрдүн укуктук маданиятын жогорулатууга, мыйзамды сыйлоо түшүнүгүн калыптандырууга жана өспүрүмдөр арасында терс көрүнүштөрдүн алдын алууга багытталды.
