Пробация департаменти менен Кыргызстан мусулмандарынын дин башкармалыгы кызматташуу боюнча Меморандумга кол коюшту

Меморандумдун негизги максаты – диний, экстремисттик жана террористтик мүнөздөгү кылмыштар үчүн соттолгон пробация кардарларынын кылмыштарын кайталоосун алдын алуу, аларды реабилитациялоо жана коомго кайра интеграциялоо болуп саналат.

Бул келишимдин алкагында Тараптар төмөнкү багыттарда кызматташат:

• биргелешкен жолугушууларды жана талкууларды өткөрүү;

• кызматташтык жаатына тиешелүү маалыматтар менен алмашуу;

• пробация кардарлары менен иштөөдө Call-борбор аркылуу маектешүүлөрдү жүргүзүү;

• диний сабаттуулукту жогорулатууга багытталган сабактар менен курстарды уюштуруу;

• конференциялар, семинарлар жана тегерек столдорду өткөрүү;

• аймактык пробация кызматкерлеринин квалификациясын жогорулатуу жана экстремизм менен терроризмге каршы аракеттенүү тармагында тажрыйба алмашуу.

Бул кызматташтык коомдук коопсуздукту чыңдоого, пробация кардарларынын коомго кайтып, жоопкерчиликтүү жарандар катары жашоосуна өбөлгө түзүүгө багытталган.

Иш-чарага Пробация департаментинин жетекчилиги жана КМДБнын өкүлдөрү катышып, өз ара кызматташтыкты мындан ары да чыңдоо боюнча пикир алмашышты.