Пробациялык көзөмөлдө турган аялдарга колдоо көрсөтүү: иштөөдөгү жаңы ыкмалар
"Белогорка" жаратылыш эс алуу зонасында Кыргыз Республикасынын Юстиция министрлигине караштуу Пробация департаментинин уюштуруусу менен пробациялык көзөмөлдө турган аялдар үчүн иш-чара болуп өттү.
Жолугушуунун максаты – психоэмоционалдык колдоо көрсөтүү жана коомдогу толук кандуу жашоого кайтуу процессинде коштоо.
Пробация органдарынын негизги милдеттеринин бири – көзөмөл гана эмес, кардарларды реабилитациялоо жана ресоциализациялоо үчүн шарттарды түзүү. Бул өзгөчө оор турмуштук кырдаалга кабылган жана каталарынын кесепеттерин жоюуга умтулган аялдар менен иштөөдө маанилүү. Мындай адамдарга колдоо көрсөтүү сезимталдыкты, профессионализмди жана комплекстүү мамилени талап кылат.
Иш-чаранын катышуучулары үчүн коопсуз жана ишенимдүү мейкиндик түзүлдү, анда алар өздөрүнүн сезимдери менен бөлүшүп, ички чыңалууну азайтып, колдоону сезе алышты. Инструменттердин бири катары медитация жана топтук иштин элементтери менен толукталган мандала-терапия методикасы колдонулду. Бирок бул жолугушуунун эң негизгиси – көңүл буруу, катышуу жана пробациянын жаңы жашоо баштоону каалагандар менен бирге болууга даярдыгы.
Иш-чарага пробациялык көзөмөлдө турган аялдарга колдоо көрсөткөн Социалдык коштоо жана пенитенциардык пробация башкармалыгынын, Пробация департаментинин психологиялык иштер боюнча башкармалыгынын кызматкерлери катышты.
Пробация – бул көзөмөл гана эмес, колдоо дагы. Мындай иш-чаралар кардарлардын калыбына келүүсү жана ийгиликтүү ресоциализациясы үчүн шарттарды түзүүгө жардам берет, алардын коомдогу активдүү жашоого кайтып келүүсүнө өбөлгө түзөт."
