Коомдук коопсуздукту санариптештирүү аркылуу жогорулатуу: электрондук көзөмөлдүн алгачкы жыйынтыктары
2024-жылдын май айында Кыргыз Республикасынын Юстиция министрлигинин алдындагы Пробация департаменти санариптештирүү алкагында электрондук көзөмөлдү пилоттук режимде ишке киргизген. Бул ыкма пробациянын кардарларына көзөмөлдү күчөтүүгө, кайталап кылмыш жасоо коркунучун азайтууга жана коомдук коопсуздукту жогорулатууга багытталган.
Электрондук көзөмөл эки ыкма менен жүргүзүлөт: электрондук билериктер жана «Мобилдик контроль» тиркемеси аркылуу. Ал негизинен зордук-зомбулук кылмыштарын жасаган жана кылмышты кайра жасоо коркунучу жогору болгон, шарттуу түрдө мөөнөтүнөн мурда бошотулган пробация кардарларына карата колдонулат.
2024-жылдын май айынан тартып бүгүнкү күнгө чейин электрондук көзөмөл 2029 пробация кардарына колдонулду. Алардын ичинен:
электрондук билериктер – 256 кардарга;
«Мобилдик контроль» тиркемеси – 1773 кардарга.
Белгилей кетсек, электрондук көзөмөл колдонулган бир дагы кардар көзөмөл учурунда кайра кылмыш жасаган эмес.
Маалымат катары: Электрондук көзөмөл Кыргыз Республикасынын «Пробация жөнүндө» мыйзамында каралган жана электрондук-техникалык каражаттарды колдонуу менен сот тарабынан пробация кардарларына жүктөлгөн көзөмөл талаптары менен милдеттеринин аткарылышын көзөмөлдөөнүн натыйжалуулугун жогорулатууга багытталган.
