Пенитенциардан кийинки пробация
Пенитенциардан кийинки пробация деген эмне?
Бул - түзөтүү мекемелеринен мөөнөтүнөн мурда шарттуу бошотулган адамдарга карата колдонулуучу жана аларды кайра социалдаштыруу максатында социалдык колдоо көрсөтүү боюнча иш жүргүзүүдөн турган пробация.
КР "Пробация жөнүндө" Мыйзамынын 12-беренесинин 1- жана 2-пункту: Пенитенциардан кийинки пробация - түзөтүү мекемелеринен мөөнөтүнөн мурда шарттуу бошотулган адамдарга карата колдонулуучу жана аларды кайра социалдаштыруу максатында социалдык колдоо көрсөтүү боюнча иш жүргүзүүдөн турган пробация. Мөөнөтүнөн мурда шарттуу бошотулган адамдарга карата түзөтүү мекемелеринде жүргүзүлүп келген социалдык колдоо жана кайра социалдаштыруу боюнча иш-чаралар улантылат.
Демек, соттолгон адам боштондука чыкты, эми ал пробациянын көзөмөлүнүн алдында турат. Ал түзөтүү мекемелеринен жазадан шарттуу түрдө мөөнөтүнөн мурда бошотулгандан кийин, мыйзам талабы боюнча, 5 күндүн ичинде өзү жашаган дарек боюнча пробация органына барып каттоого турушу зарыл.
Пенитенциардык пробацияда түзөтүү мекемелери тарабынан бир жыл аралыгында жазадан шарттуу түрдө мөөнөтүнөн мурда бошотула турган соттолгон адамга карата, алардын өздүгүнө жана муктаждыгына жараша социалдык-укуктук жардам көрсөтүү, аларды кайра коомго аралаштыруу максатында жеке программа түзүлөт, сот тарабынан бошотулгандан кийин, программада каралган иш-чаралар, пробация кардары жашаган дареги боюнча пробация органы тарабынан улантылат.
Кардар боштондукка чыккандан кийин, пробация органдары кардарын боштондука даярдоодон реалдуу жардам көрсөтүүгө өтөт. Пробациянын кызматкерлери тарабынан, социалдык-укуктук жардам көрсөтүү максатында, түзүлгөн жекече программа жана пробация көзөмөлүнүн планы боюнча социалдык, укуктук жана психологиялык жардам, пайдалуу байланыштарды түзүүгө жана калыбына келтирүүгө жардам көрсөтүлөт.
Эгер кардар макул болсо, пробациянын психологтору кеңешме тартибинде жаңы жашоо баштагандан кийин туруктуу иш менен камсыз кылуу максатында, кардардын туруктуу психологиялык мүнөзүн түзүүгө көмөк көрсөтөт. Ошондой эле пробациянын кардары үчүн пробациялык көзөмөл боюнча милдеттердин айрым бөлүгүн аткара турган ыктыярчыны бекитиши мүмкүн.
Ошондой эле, пробация органдары кардардын ишке орношуусуна, кесиптик билим алуусуна, жашаган жери боюнча каттоого туруу үчүн зарыл болгон документтерди алуусуна жана медициналык, социалдык кызматтарды алууга, пенсиондук камсыздоого көмөк көрсөтүшөт.
КР "Пробация жөнүндө" Мыйзамынын 12-беренесинин 3-пункту: Түзөтүү мекемелеринен бошотулган адамдар жазык-аткаруу мыйзамдарында белгиленген тартипте жашаган жерине акысыз жетүү, тамак-аш азыктары же акча, сезонго жараша зарыл кийим жана бут кийим менен камсыз кылынат.
Пробация кардарынын, программада көрсөтүлгөн талаптарды аткаруудан баш тартышы, пробация органынын, ага карата сотко жазадан бошотуу, жазык-укуктук таасир этүүнүн мажбурлоо чараларын өзгөртүү, сот тарабынан дайындалган айрым милдеттенмелерин жарым же болбосо толук жокко чыгаруу жөнүндөгү сунуштарды, ошондой эле пробация көзөмөлүнүн планынын пробация кардары тарабынан аткарылышы жөнүндөгү жыйынтык түзүүдө эске алынат, натыйжалары пробация органынын корутундусунда чагылдырылат.
