Пробация органдарынын психологдору жана социалдык кызматкерлери мыйзамды бузган балдар менен иштөө боюнча окуудан өтүштү
Кыргыз Республикасынын Юстиция министрлигинин алдындагы Пробация департаменти (мындан ары – Департамент) өз кызматкерлеринин кесиптик деңгээлин жогорулатууга өзгөчө көңүл бурат.
Пробация органдарынын кызматкерлеринин балдар менен иштөө боюнча потенциалын жогорулатуу максатында Департамент "Инсан мууну" коомдук фонду менен биргеликте "Ювеналдык пробацияда психологиялык жана социалдык коштоонун негиздери" темасында бир катар онлайн жана офлайн тренингдерди өткөрүүдө. Бул тренинг мыйзам бузган балдар менен иштеген пробация органдарынын адистери үчүн арналган.
Тренингдин бир бөлүгү онлайн режимде, Zoom платформасы аркылуу 2020-жылдын 8-9-сентябрында өткөрүлгөн. Оффлайн-окутуу пробация департаментинин окуу-методикалык кабинетинде жүргүзүлдү. Бишкек шаарынын жана Чүй облусунун пробация органдарынын адистери 10-11-сентябрда, ал эми аймактардагы пробация органдарынын кызматкерлери 14-15-сентябрда окууга катышышты. Өтүлгөн материалды бекемдөө максатында 25-сентябрга чейин бир катар кошумча онлайн тренингдерди өткөрүү күтүлүүдө.
Клиникалык психолог – Перизат Асылбаева жана врач-психиатр – Аида Парпиева Департаменттин адистери менен балдардын психологиясы жөнүндө өз билимдери менен бөлүшүп, социалдык жана психологиялык иштин калыбына келүү методдору, укук бузган балдарды психосоциалдык коштоо технологиялары жөнүндө айтып беришти.
Пробация органдарынын социалдык кызматкерлери жана психологдору жашы жете элек укук бузуучунун сүрөттөмөсүн жана ага курчап турган чөйрөнүн, үй-бүлөнүн жана коомдун таасирин изилдешти. Өспүрүмдөр кылмыш жасоого эмне себеп менен шыктанарлыгын карап чыгып, алдын алуу ыкмалары жөнүндө жаңы маалымат билишти.
