Юстиция министрлигинин коллегиясы тарабынан 2020-жылга карата артыкчылыктуу пландар белгиленген
2020-жылдын 7-февралында Кыргыз Республикасынын Юстиция министри Марат Джаманкуловдун төрагалыгы астында 2019-жылдын жыйынтыгы боюнча коллегиянын отуруму болуп өттү.
Катышуучулардын алдында сөз сүйлөп жатып Марат Джаманкулов өткөн жылда министрлик тарабынан жетишилген негизги натыйжаларды белгиледи. Ошондой эле, “2019-жылдын Региондорду өнүктүрүү жана өлкөнү санариптештирүү жылы деп жарыялоо жөнүндө” Кыргыз Республикасынын Президентинин Жарлыгын ишке ашыруу алкагында министрлик тарабынан "Онлайн" юридикалык жактарды каттоо", "Электрондук нотариат", "Электрондук портал коомдук талкуулоо ченемдик укуктук актылардын долбоорлорун" маалыматтык системалар иштелип чыкты жана ишке киргизилди. «Кыймылдуу мүлккө талап укуктарынын бирдиктүү мамлекеттик реестринде кыймылдуу мүлккө талап укугун каттоо»Автоматташтырылган маалыматтык системасы "Түндүк"электрондук ведомстволор аралык ѳз ара аракеттенүү системасына (ЭВӨС) кошулду.
Минстрликтин башчысы, сот укуктук реформаны ишке ашыруу боюнча иш-чаралардын алкагында калкка мамлекет кепилдеген юридикалык жардам көрсөтүү чөйрөсүндө иш аракеттер жакшыртылгандыгын жана активдештирилгендигин, ошондой эле Пробация департаменти түзүлгөндүгүн, ал 2019-жылдын 1-сентябрынан баштап ишин баштагандыгын белгилеп өттү.
Ошону менен бирге, Марат Джаманкулов Юстиция министрлиги тарабынан өлкөнүн айрым региондоруна юстициянын аймактык түзүлүштөрү үчүн мамлекеттик нотариустарды, пробация кызматынын кызматкерлерин жана калкка мамлекет кепилдеген юридикалык жардам көрсөтүү боюнча адвокаттар реестринде турган адвокаттарды жайгаштыра турган юстиция үйлөрүн куруу демилгеленип жаткандыгын маалымдады.
Кыргыз Республикасынын Өкмөтү тарабынан бул демилге колдоого алынган жана алгач бул максатка 10 млн. сом өлчөмүндө акча каражаты бөлүнгөн.
Коллегиянын жүрүшүндө, ошондой эле статс-катчынын жана министрдин орун басарларынын, өздөрү тейлеген багыттар боюнча отчеттору угулду: аткаруучулук жана эмгек тартиби, юридикалык жактарды жана күрөөнү каттоо, укуктук маалымат жана ЧУА долбоорлорун экспертизадан өткөрүү, адвокатура, нотариат жана апостилдөө, укуктук пропаганда, ЧУА долбоорлорун иштеп чыгуу жана ж.б.
Өзгөчө Кыргыз Республикасынын Юстиция министрлигинде Тутумдуу коррупцияны жоюу боюнча иш-чаралардын деталдаштырылган планында көрсөтүлгөн иш-чаралардын аткарылышы жөнүндө маалыматтарга көңүл бурулду. Коррупциялык көрүнүштөрдү жокко чыгаруу максатында аймактык юстиция башкармалыктарынын жетекчилерине нотариалдык аракеттердин сырын эске алуу менен мамлекеттик нотариустардын кабинеттеринде видео байкоо камераларын орнотуу тапшырылды.
Коллегиянын жүрүшүндө 2020-жылга карата төмөнкүдөй артыкчылыктуу пландар белгиленген:
- министрликтин ишинде санариптик технологияларды андан ары киргизүү;
- Юстиция үйлөрүн куруу;
- ведомстволук нотариалдык архивди түзүү;
- апостилдештирүү функцияларын борбордук аппараттан облусттук юстиция башкармалыктарына берүү ж.б.
Отурумдун жыйынтыктары боюнча коллегия Юстиция министрине түзүмдүк, ведомстволук жана аймактык бөлүнүштөрдүн айрым жетекчилерине жүктөлгөн милдеттерин жана тапшырмаларын талаптыгыдай эмес аткаргандыгы үчүн тартиптик жаза колдонуу тууралуу сунуш киргизилди.
